ಶ್ರೀಮಚ್ಛರ್ವಂ ಪರಮಸ್ವಾಮಿ ದಯಾವಾರ್ಧಿ ಭಕ್ತಿಯಿಂ ಕುಡುಗೆಮಗುದ್ದಾಮ ಸುರರಾಜರಾಜಂಸೋಮಧರಂ ಕೂರ್ತು ಹಂಪೆಯ ವಿರೂಪಾಕ್ಷಂ

ಆ ಹಿಮಶೈಲದುತ್ತರವಿಭಾಗದೊಳೊಪ್ಪುವುದಾತ್ತನಂದನವ್ಯೂಹ ತಟಾಕ ವೀಥಿ ಕಳಮಾವಳಿ ಕೈರವರಾಜಿಯಬ್ದಸಂದೋಹ ವಿಶಾಲ ರಾಜನಗರೀವ್ರಜ ಚಾರುನದೀನದಾಳಿಯುತ್ಸಾಹ ಸಮಗ್ರದಿಂದ ಗಿರಿರಾಜನ ದೇಶಮಿಳಾವಿಭೂಷಣಂ

ಸೊಗಯಿಪ ದೇಶಮಚ್ಚರಿಯ ದೇಶಮದುತ್ತಮ ದೇಶಮಾಗೆಯುಂಬಗೆದುದನೀವ ದೇಶಮತಿ ಮಂಗಳ ದೇಶಮನೂನದೇಶಮುರ್ವಿಗೆ ಸುಖಮಪ್ಪ ದೇಶಮುದಿತೋದಯ ದೇಶಮಪಾರಪುಣ್ಯಕಾರಿಗಳನುಕೂಲದೇಶಮಮೃತೋದಯದೇಶಮದೆಂತು ಬಣ್ಣಿಪೆಂ

ತೀವಿ ಬೆಳೆಯಿಲ್ಲದಿಳೆಯಿಲ್ಲಾವಡೆ ಬೆಳೆಯಿಸದ ವನಮದಿಲ್ಲನವರತಂಪೂವಿಲ್ಲದ ಕೊಳನಿಲ್ಲ ಫಲಾವಳಿಯಿಲ್ಲದ ಮರಂಗಳಿಲ್ಲಾ ನಾಡೊಳ್

ಅಳಿಯಾಸೆ ಪುಷ್ಪವಾಟೀಸ್ಥಳದೊಳ್ ರಾಜಭಯಮಬ್ಜಸಂಕುಳದೊಳ್ ಸಂಚಳತೆ ಪವಮಾನನೊಳ್ ವಿಹ್ವಳತೆ ರಥಾಂಗದೊಳಮಲ್ಲದಿಲ್ಲಾ ನಾಡೊಳ್

ಸಕಲಂಕತೆ ಚಂದ್ರಮನೊಳ್ವಿಕಲಧ್ವನಿ ವಿಹಗದಲ್ಲಿ ಭಂಗಂ ನದಿಯೊಳ್ಸಕುಟಿಲತೆ ಲತೆಗಳೊಳ್ ಭುವನಕಂಟಕಂ ಬಿಸದೊಳಲ್ಲದಿಲ್ಲಾ ನಾಡೊಳ್

ಕರವಿಚ್ಛೇದಂ ಗ್ರಾಮನಿಕರಂಗಳೊಳ್ ಬಂಧನಂ ಕುಸುಮಮಾಲಿಕೆಯೊಳ್ಪರವಶಮೆಂಬುದು ಯೋಗೀಂದ್ರರೊಳಲ್ಲದೆ ಶೈಲವತಿಯ ದೇಶದೊಳುಂಟೇ

ಆ ಮಯಮಕ್ಷರ ಕುಲದೊಳ್ಸಾಮಂ ವೇದಂಗಳಲ್ಲಿ ಭೀಮಂ ಚಿತ್ರಸ್ತೋಮದೊಳಂ ಕ್ಷಾಮಂ ಲಲನಾಮಧ್ಯದೊಳಲ್ಲದಾ ಸುದೇಶದೊಳುಂಟೇ?

ಆ ದೇಶಂ ಸಲೆ ಗಿರಿರಾಜಾದೇಶಂ ತೀವಿ ವಿಪ್ರವೇದೋಚ್ಚರಣಾನಾದ ಶಿವವಾಕ್ಯದೊಳ್ ಸಮನಾದ ಶಿವಜ್ಞಾನಗಾನದಿಂದಿಸೆದಿರ್ಕುಂ

ಗ್ರಾಮಂ ಜಿತಾಘಕುಲಸಂಗ್ರಾಮಂ ಸದನಂ ಸುಖಕ್ಕೆ ಪಸದನಮೆಸೆವಾರಾಮಂ ರಾಮಂ ಜನಕುಲಕಾಮಂ ಕಾಮಹರಪೂಜೆ ನೋಡಾ ನಾಡೊಳ್

ಕಲ್ಲೆಲ್ಲಂ ಪರುಷಂ ತರುವೆಲ್ಲಂ ಕಲ್ಪತರು ಗುಲ್ಮಮೆಲ್ಲೌಷಧಿ ಗೋವೆಲ್ಲಂ ಸುರಭಿಕುಲಂ ಮಡುವೆಲ್ಲಂ ಸಿದ್ಧರಸಮೆನಿಕುಮಂತಾ ನಾಡೊಳ್

ಆ ವಿಷಯದೊಳೊಪ್ಪುವ ಕಳಮಾವಳಿ ನಳನಳಿಸಿ ಬೆಳೆದು ಪಸುರೇಱಿ ಲಸದ್ಭೂವನಿತೆಗೆ ಧಾತ್ರಂ ಪರಿಭಾವಿಸಿ ಪೊದೆಯಿಸಿದ ಹರಿತಪಟದಂತಿರ್ಕುಂ

ಸೊಂಪಾಗುತ್ತಂಕುರಿಸುತ್ತುಂ ಪಸುರೇಱುತ್ತೆ ಕವಲಿಱಿದು ಪೊಡೆಯೊತ್ತುತ್ತುಂ ಪಾಲೆಱುತ್ತುಂ ನೆಱೆದಿಂಪಿಂ ನಳನಳಿಸಿ ಶಾಲಿವನಮೆಸೆದಿರ್ಕುಂ

ಉಗುವೆಳನೀರಿಂದಂ ಕದಳಿಗಳಾ ಕದಳಿಗಳ ಪಣ್ಣ ರಸದಿಂ ಪುಂಡ್ರೇಕ್ಷುಗಳಿಕ್ಷುರಸದಿನಾ ಕಳ-ವೆಗಳಾ ಕಳವೆಗಳ ಕಣಿಶದಿಂ ಗಿಳಿ ಬಳೆಗುಂ

ತ್ವರಿತಗತಿಪ್ರಚಾರತೆ ಮರಾಳಲಸದ್ಗತಿ ಸಾರುತೆಳ್ಬಲಬ್ಬರಿಸುವ ನಾದಮನ್ಯಭೃತನಾದಮಡರ್ಚುತಿರಲ್ಕೆ ಮಚ್ಚಿ ಮಚ್ಚರಿಸುವ ತೋಳ್‌ ಮರುದ್ಧತಲತಾಕುಳಮೆಂದುಱೆ ಪಕ್ಕಿಸೋವ ಪಾಮರಿಯರ ಝಂಕೆಗಲ್ಲಿ ಗಿಳಿಯಂಜದೆ ಬೆರ್ಚದೆ ನಿಲ್ಕುಮಾವಗಂ

ಮುಡಿ ಮೊಲೆ ನಿತಂಬಭಾರದಿನಡಿಯಿಡಲಾಱದೆ ಶುಕಾಳಿಯಂ ಪಾಮರಿಯ‌ರ್ಬಿಡೆ ಸೋವುತ್ತಿರ್ಪರ್ ಸಂಗಡಮಿರ್ದಲ್ಲಿರ್ದು ಬಱಿಯ ಗಳಬಳದಿಂದಂ

ಗಿಳಿಯಂ ಸೋವೆಳೆಯಳ ನುಡಿವಳಿಯಿಂದೆ ವಿಕಾಸಮಾದ ಬಾಯ್ದೆಱೆಗಂಡಂದೆಳಸುತ್ತಿರ್ಪುವು ದಾಡಿಮಫಳಬೀಜಂಗೆತ್ತು ದಂತಕುಳಮಂ ಗಿಳಿಗಳ್

ಪತ್ತಿತು ಬಿಸಿಲುಱೆ ಕಾಲಂಮುತ್ತಿತು ನೋವುದಕದಿಚ್ಛೆಯಿಂದಂ ಬೆಳರ್ವಾಯ್ಬತ್ತಿತ್ತಯ್ಯೋ ಶ್ರಮಮನಿನಿತ್ತಂ ಕಳೆವವರೆ ಜಾಣರೆನುತುಂ ನುಡಿದಳ್

ನುಡಿಯೆ ಬಳಲ್ದ ಪಾಂಥನೆರ್ದೆ ತಣ್ಪಿನ ಸೋನೆಯನಾಂತ ಮಾಳ್ಕೆಯಿಂಪೊಡಕರಿಸುತ್ತೆ ಪೆರ್ಚಿಮಿಗೆ ಸಾರ್ದು ನಿವಾಸಸುಖಸ್ಥಳಕ್ಕೆ ಬಂದೆಡೆಗುಡದನ್ಯಚಿಂತೆಗೆ ಮನೋಜಸುಖಾರ್ಣವಮಧ್ಯದೊಳ್ ಮನಂಗುಡುತಮಮರ್ಚುತೀ ಸುತೆ ಧುಡುಮ್ಮಿಱಿಯುತ್ತಮೆ ಪಾಂಥನೊಪ್ಪಿದಂ

ನೆಳಲಾದುದು ಧಮ್ಮಿಲ್ಲಂಪುಳಿನಸ್ಥಳಮಾಯ್ತು ವೃತ್ತಜಘನಭರಂ ಶೀತಳತರಜಳಮಾದುದು ಕೋಮಳೆಯಧರ ಮರೀಚಿ ಪಾಂಥನೇಂ ಬರ್ದುಕಿದನೋ

ಕಳಕೇಕೀಕೇಶಪಾಶಂ ಶಶಿನಿಭವದನಂ ಭೃಂಗನೀಲಾಳಕಂ ಸಂಚಳಿತ ಪ್ರೋನ್ಮತ್ಸ್ಯನೇತ್ರಂ ಘಟಕುಚಯುಗಳಂ ಲೇಶಮಧ್ಯಂ ಗಭೀರೋಜ್ಜ್ವಳ ಶೋಭಾನಾಭಿ ಕುಂಭಸ್ಥಳಸದೃಶನಿತಂಬಂ ಸುರಂಭಾವಿಳಾಸಂದಳೆದೊಪ್ಪಿರ್ದೂರುದಂಡಂ ತನಗೆಸೆದಿರೆ ಸಂತಂ ಪ್ರಪಾಕಾಂತೆಯಿರ್ದಳ್

ವರನಾಭಿ ಸುಳಿಗಳಂ ತೋಳ್ತರಂಗಮಾಲೆಗಳನಂಬಕಂ ಮತ್ಸ್ಯಮನಂಗರುಚಿ ರುಚಿರಾಂಬುವಂ ಪೋಲ್ತು ರಮಣಿ ನದಿಯಂದದಿಂ ಪ್ರಪಾಂತದೊಳಿರ್ದಳ್

ಇರೆ ಬಂದ ಪಥಿಕನೋರ್ವಂತರುಣಿಯ ಲಾವಣ್ಯರಸಮನಕ್ಷಿಗಳಿಂದಂಬರೆ ಪೀರ್ದು ದಣಿದು ಬಟ್ಟೆಯಪರಿಶ್ರಮವ್ಯಥೆಯನಱಿಯದಿರ್ದಂ ಸುಖದೊಳ್

ತೀರ್ದುದು ನೀರ್ ತೀರ್ದುದು ತೃಷೆತೀರ್ದುದು ಕಡುಸೇದೆ ತೀರ್ದೊಡೇಂ ಪಥಿಕಂ ತಾನಿರ್ದಂತಿರ್ದಂ ಸ್ತ್ರೀಮುಖಮಿರ್ದಿರವಂ ನೋಡುವಾಸೆ ತೀಱದೆ ಮನದೊಳ್

ನಡೆ ನುಡಿ ಬಳಲ್ಕೆ ಮುನ್ನಂಕಡು ಚಲ್ವೆಯ ರೂಪುಗಂಡ ಬಳಿಕಂ ನಡೆಯರ್ನಡುಯ‌ರ್ ನೀರಂ ಕುಡಿಯ‌ರ್ನಡೆನೋಡುತ್ತಿರ್ಪರತನುಶಿಥಿಲರ್ ಪಥಿಕರ್

ಅಂಬುವನೆಱೆವಾಗಳ್ ಪ್ರತಿಬಿಂಬಿಸೆ ಕೆಯ್ನೀರೊಳವಳ ವದನಂ ಪಥಿಕಂನಂಬಿ ನಲಿದೀಂಟಿದಂ ಪ್ರತಿಬಿಂಬಾಧರ ಮಧುರರಸಮನೀಂಟುವ ತೆಱದಿಂ

ಬಳಸಿಗಮೊಪ್ಪಿದುವು ಜಿನುಗಿಗಳಪಿ ಕುಳಿರ್ಕೋಡಿ ಕಳ್ತಲಿಸಿ ಮಲೆದುದ್ದಂದಳೆದು ಫಲಮಾಗೆ ಪರಿವಡೆದಳಿ ಗಿಳಿ ಮಡು ಗಿಡು ಕರಿ ಗಿರಿ ಚೂತಂ ಗೀತಂ

ನಾನಾ ದೇವಾಯತನಾನೂನವಿಭೋಗಾದಿ ಸಂಪದಪ್ರದಮೆನಿಸಿರ್ಪಾನಾಡಿಂಗೆ ಶಿರೋಮಣಿತಾನೆನಿಕುಂ ಪೆಸರೊಳೋಷಧಿಪ್ರಸ್ಥಪುರಂ

ಅದು ಗಿರಿರಾಜನ ರಾಜ್ಯಾಸ್ಪದ ರಾಜಿತರಾಜಧಾನಿ ತಾನೆಂದೆನಿಸಿರ್ಪುದು ಪುರಮಾ ಪುರಮಂ ಸುತ್ತಿದ ಬಹಿರುದ್ಯಾನಚಯಮನಾರ್ ಬಣ್ಣಿಸುವ‌ರ್

ಕರಮೆಸೆವೀಳೆ ಬಾಳೆ ನವಪೂಗಚಯಂ ಪನಸಾಳಿ ಶಾಳಿ ಭಾಸುರ ಸುರಹೊನ್ನೆ ಜಂಬು ಘನನಿಂಬಕುಳಂ ಬಕುಳಂ ಕವುಂಗು ತೆಂಗುರುತರಮಾತುಳಂಗತತಿ ಚೂತಕುಜಾತಮಶೋಕೆ ಪೂಗೊಳಂಕುರುವಕನತ್ತಮಾಲ ಕೃತಮಾಲ ತಮಾಲದಿನೊಪ್ಪುಗುಂ ವನಂ

ಸಿರಿತಂದಿಕ್ಕಿದಶೋಕೆ ವಾಗ್ವನಿತೆಯಿಟ್ಟಾಮ್ರಂ ಶಚೀದೇವಿಯಿಟ್ಟರನೇರಿಲ್ ಮಿಗೆ ರಂಭೆಯಿಟ್ಟ ಕದಳೀಷಂಡಂ ಸುರಸ್ತ್ರೀಯರಿಟ್ಟರವಿಂದಾಕರಮೂರ್ವಶೀವಧು ಸರಾಗಂ ತಂದ ಪೂಗದ್ರುಮಂತರದಿಂದಂ ರತಿಯಿಟ್ಟ ದಾಡಿಮಕುಲಂ ಸಾರ್ವರ್ತುಕೋದ್ಯಾನದೊಳ್

ಸುರುಚಿರಸಾರಪಕ್ವಫಲವಕ್ತ್ರಲಸಚ್ಛುಕಚುಂಬನಂ ಬನಂಪರಮವಿರಕ್ತಸಂತತಿಗಿದೇತಱ ಮೋಹನಮೆಂಬಿನಂ ಬನಂಚರಿತದೆ ಸೋಲಿಕುಂ ಶುಕಪಿಕಾಳಿಕುಲಕ್ಕತಿಜೀವನಂ ವನಂಧರೆಗೆ ವಿಚಿತ್ರಭಾಸುರಮದೇಳಿಪುದಗ್ಗದ ಕಾವನಂ ವನಂ

ಅಂಕುರದಿಂ ಪ್ರವಾಳಕುಲದಿಂ ನನೆಯಿಂ ಮುಗುಳಿಂ ಪ್ರಸೂನದಿಂದಂ ಕಿಱುಗಾಯ್ಗಳಿಂ ತೊರೆದ ದೋರೆಗಳಿಂ ತನಿವಣ್ಣ ಪಂಕ್ತಿಯಿಂದಂ ಕಳಕಂಠಕೂಜಿತದಿನೊಪ್ಪುವ ಷಟ್ಪದವೃಂದಗಾನದಿಂದಂ ಕಡುಕೊರ್ಬಿ ಚಪ್ಪರಿಪ ರಾಜಶುಕಾಳಿಯಿನಾಮ್ರಮೊಪ್ಪುಗುಂ

ಇದು ರತಿರಾಜಭದ್ರಗಜಮೋ ಇದು ಚೈತ್ರನ ರಾಜಧಾನಿಯೋಇದು ವನಲಕ್ಷ್ಮಿಗೆತ್ತಿಸಿದ ಪೀಲಿಯ ಸತ್ತಿಗೆಯೋ ವಸಂತನಿಂದಿದು ಶಶಿಯಳ್ತಿಯಿಂ ಸಲಪಿದರ್ವಿದ ಕೊರ್ವಿದ ಕಲ್ಪವೃಕ್ಷಮೋಇದು ಧರೆಯಿಂದೆ ಮೂಡಿದ ನವಾಂಬುದಮೋ ಎನೆ ಚೂತಮೊಪ್ಪುಗುಂ

ತರದಿಂದಂಕುರಮಂ ಕುರಪ್ರಕರದಿಂದಂ ಪಲ್ಲವಂ ಪಲ್ಲವೋತ್ಕರದಿಂದಂ ಕುಸುಮಂ ಲಸತ್ಕುಸುಮದಿಂ ಚಂಚತ್ಫಲಂ ತತ್ಫಲೋತ್ಕರದಿಂ ಚಾರುಶುಕಂ ಶುಕಾವಳಿಗಳಿಂ ಭೃಂಗಾಳಿ ಭೃಂಗಾಳಿಯಿಂಪರಪುಷ್ಟಂ ಪರಪುಷ್ಟಪೋತಕಕುಲಂ ಪೊಣ್ಮಿರ್ಪುದಿಮ್ಮಾವಿನೊಳ್

ಸಲೆ ಸಹಕಾರದಲ್ಲಿ ಕೆಲವಂಕುರಮಂ ಕೆಲವಾಪ್ರಸೂನಮಂಕೆಲವು ಫಲಂಗಳಂ ಮಿಸುಪ ಚಂಚುಗಳಿಂ ನವನಾಸಿಕಂಗಳಿಂತೊಲಗದೆ ಜಿಹ್ವೆಯಿಂ ಕರ್ದುಕಿ ವಾಸಿಸಿ ಪೀರ್ದುಱೆ ಸೊರ್ಕುತುಂ ಕರಂನಲಿಯುತೆ ಮೀಱಿ ತೊಂಡುಗೆಡೆಯುತ್ತ ಪಿಕಾಳಿ ಶುಕಾಳಿಯೊಪ್ಪುಗುಂ

ಕಾವಂಗೆಂದು ವಸಂತಂಭಾವಿಸಿ ಸಮೆದಿಟ್ಟ ನೀಲದರಮನೆಯೆನಿಕುಂಮಾವಿನ ಹೂವಿನ ಕಾವಿನಠಾವಿನ ಮೊದಲಿಂದೆ ತೀವಿದಳಿಗಳ ಬಳಗಂ

ಬಿರಿಯಲ್ ಪೊಂಗಿದ ಪಣ್ಗಳಸಿರೆಯಱಿದಲ್ಲಿರಿಸಿ ಚಂಚುಪುಟದಿಂ ಸವಿಯಂಬರೆತೆಗೆದು ತಣಿವು ತವಕಮನರಳ್ಚುತ್ತಿರೆ ಮೆಱೆದುದಾಮ್ರದೊಳ್ ಶುಕನಿಕರಂ

ಬಿಗಿಯಪ್ಪಿ ಮೊಗಮನಿಟ್ಟಾಲಿಗಳವು ನಸುಮುಚ್ಚೆ ಪಕ್ಷಯುಗಮೆಳಲೆ ರಸಂದೆಗೆವ ದನಿ ನಿಮಿರ ನಾಲಗೆಚಿಗುರುತ್ತಿರೆ ಸವಿದುದೊಂದು ಗಿಳಿ ತನಿವಣ್ಣಂ

ಎಳಸಿ ನೆಗೆತಂದು ಮಿಕ್ಕಗ್ಗಳಿಸುತಮಿರ್ದಂತಿರಪ್ಪೆ ಮಧುರಸಸಂ ವೆಗ್ಗಳಿಸೆ ಲವಲವಿಸುತುಂ ಪಣ್ಗಳೊಳಳ್ದುದದೊಂದು ರಾಜ ಶುಕನತಿಭರದಿಂ

ಅರಳೆಲೆ ಮೇಲಾಡುತ್ತಿರೆಭರದಿಂ ಮಾಂಗಾಯ್ಗಳೊಲೆಯೆ ಕೆಲಬಲದೊಳ್ ನಿಂದರಗಿಳಿಯ ತೊದಳ್ನುಡಿ ಬಿತ್ತರಿಸೆ ವಸಂತನ ಕುಮಾರನೆನಿಸಿತ್ತಾಮ್ರಂ

ಅಂತಂತೆ ನಲಿದು ನಾಲಗೆತೀಂತೆ ಮಿಗಲ್‌ ಕಳಿಕೆಗೆಳಸಿ ಚಂಚುವನಿಟ್ಟೋರಂತೆ ಸವಿ ಸವಿದು ಸೊರ್ಕಿ ನಿರಂತಂ ಕರೆದತ್ತು ಮಾವಿನೊಳ್ ಪರಪುಟ್ಟಂ

ಅಳಿ ಗಿಳಿ ಪಿಕಕುಲರವದಿಂನೆಳಲಿಂ ರೂಪಿಂ ಫಲಂಗಳಿಂ ಪೂವಿಂದಂಬಳಸಿ ತಣಿಪುವುದು ಪೊಸಮಾವೆಳಸಿದ ಪಾಂಥಪ್ರತಾನ ಪಂಚೇಂದ್ರಿಯಮಂ

ತಿಳಿನೀರಿಂ ತಾವರೆಯಿಂಕಳಹಂಸೆಯಿನೆಸೆವುದಲ್ಲಿ ಸರಸೀಷಂಡಂತಳಿರಿಂ ನನೆಯಿಂ ಪೂವಿಂಫಳಂಗಳಿಂದೆಸೆವುದಲ್ಲಿ ಚೂತಕುಜಾತಂ

ಪಿಕಕುಲದ ಸೊರ್ಕು ಮಧುಕರನಿಕರದ ಮದವರಗಿಳಿಗಳ ಗರ್ವಂ ನವಚೂತಕುಜಂ ಮಲ್ಲಿಗೆ ದಾಡಿಮನಿಕಾಯಮಂಕುರದೆ ಪುಷ್ಪದಿಂ ಫಲದಿಂದಂ

ಬೇರಿಂದಂ ನೀರುಂಡಾಬೇರಿಂದಗ್ರಂಬರಂ ಫಲಂಗಳನೀವೆಂಧಾರಿಣಿಗೆಂಬಂತಿರೆ ಫಲಪೂರಿತ ಪನಸದ್ರುಮಂಗಳೆಸೆದುವು ಬನದೊಳ್

ನೀರೆಱೆದುಪಕಾರಕ್ಕೆಳನೀರಂ ರುಚಿವೆರಸು ತೀವಿ ವನಪಾಲಕರಂಪಾರುತ್ತಿರ್ಪಂತಿರ್ಪುವುಸಾರಾಯ ಫಲಾಳಿನಾಳಿಕೇರಂ ಬನದೊಳ್

ವನಲಕ್ಷ್ಮಿಗೆ ಸಕಲವಿಲಾಸಿನಿಯ‌ರ್ ಬಳೆದೋಳ್ಗಳಿಂದೆ ಚಾಮರಮಿಕ್ಕಲ್ತನ ತನಗೆ ನಿಂದರೆನೆ ತದ್ವನದೊಳ್ ಪೊಂಬಾಳೆಯಿಂದೆ ಪೂಗಮದೆಸೆಗುಂ

ಕುಸುಮಶರಂಗೆ ವಸಂತಂಪೊಸ ಪೊಂಗಳಸಂಗಳಲ್ಲಿ ಸೌರಭ್ಯ ಸುಧಾರಸಮಂ ತೀವಿರಿಸಿದವೋಲೆಸೆವುವು ಫಳಭಾರಮಾತುಳಂಗವ್ರಾತಂ

ಬಾಗುತೆ ಬಲಿಯುತೆ ಪೊಳೆದಿನಿದಾಗುತೆ ದಳವೇಱಿತಿದಿಡಿದು ಹಿಗ್ಗುತೆ ಪಣ್ಣಾಗುತೆ ಕಾಯ್ಗಳ್ ಪೊಱಮಡೆಬೀಗುತ್ತುಂ ಬೆಳೆದುವಲ್ಲಿಂ ಕದಳೀಷಂಡಂ

ಅಳಿಗಳ ಗಿಳಿಗಳ ಕೋಗಿಲೆಗಳ ಕಳ ಹಂಸೆಗಳ ಪಾರಿವಂಗಳ ಕೋಕಂಗಳ ಪುರುಳಿಗಳ ನವಿಲ್ಗಳಕೊಳರ್ವಕ್ಕಿಗಳೆಸೆವ ಮನದ ಬಿನದಂ ವನದೊಳ್

ನಲಿದು ಕೊರಲೆತ್ತಿ ಕುಕಿಲಿಱಿದುಲಿದುಂ ಸುಳಿದೆಳಸಿ ಬಳಸಿ ಬಳಿಸಂದು ಪಳಂಚಲೆದೊಲೆದು ಪಕ್ಕಮಂ ಬಿರ್ಚಿ ಲಲ್ಲೆಗೆಯ್ದತ್ತು ಪಾರಿವಂ ಪಾರಿವದೊಳ್

ಚಾರುತರಂ ನಿರ್ಮಲಜಲಪೂರಂ ಸೌರಭ್ಯಮುದಿತಮದಮಧುಕರಝೇಂಕಾರಂ ಹಂಸಕುಲ ಕ್ರೇಂಕಾರಂ ರಾಜೀವಭರಿತ ನವಕಾಸಾರಂ

ಸುರರ ನಿವಾಸದಂತನಿಮಿಷಪ್ರಕರಂ ನಭದಂತಿರಬ್ಜಬಂಧುರ ಮಧುಮಾಸದಂತೆ ಸಿತಪಕ್ಷಯುತಂ ರಥದಂತೆ ಚಕ್ರವಿಸ್ತರಮುರುಪದ್ಮಜಾಂಡದವೊಲಾತ್ತರಸದ್ಭುವನಾಶ್ರಯಂ ಧನುರ್ಧರರ ಕಳಾಪದಂತೆ ರಮಣೀಯ ಶಿಳೀಮುಖಸಂಕುಳಂ

ನಳಿನದ ಕರ್ಣಿಕೆಯೊತ್ತಿನೊಳಳವಡೆ ಕಣ್ಮುಚ್ಚಿ ಮಗ್ಗುಲಿಕ್ಕಿಯಜಸ್ರಂತಳರದೆ ನಿದ್ರಾಸುಖದಿಂಕಳಹಂಸೆಯ ಮಱಿಗಳಿರ್ಪುವಂತಾ ಕೊಳನೊಳ್

ಅತಿಭರದಿಂ ನವಕುವಲಯತತಿಯೊಳ್ ಕಾಸಾರದೊಳ್ ಕುಶೇಶಯ ಚಯದೊಳ್ಲತೆವನೆಯೊಳ್ ವನದೊಳ್ ಪುಳಿನತಳದೊಳಱಸಿದುದು ಕಾಂತೆಯಂ ಕಳಹಂಸಂ

ಪುಳಿನಮನಡಿಗಡಿಗೇಱುತೆಕೊಳನೊಳಗಡಿಗಡಿಗೆ ಪೊಕ್ಕು ಪೊಱಮಡುತೆ ಲತಾವಳಿಗಳೊಳಡಿಗಡಿಗಾಲಿಸುತಳವಳದಡಿಗಡಿಗೆ ಬಳಲುತಿರ್ದುದು ಹಂಸಂ

ಬಱಿದೆ ಗಳಗಳನೆ ನಡೆವುದುಪೆಱಸಾರ್ವುದು ಬೆರ್ಚುವುದು ಬಳಲ್ವುದು ಮತ್ತೆಳ್ಚಱೊಳಿರ್ಪುದು ಕಣ್ಗಳನರೆದೆಱೆವುದು ನೆನೆನೆನೆದು ಕಾಂತೆಯಂ ಕಳಹಂಸಂ

ಇರೆ ಸಿರಿ ಬರ್ಪಂದದೆ ಸುಂದರಿ ಬರೆ ಪರಿತಂದು ಚಂಚುಗೂಡುತೆ ಪಕ್ಷಾಂತರದೊಳ್ ಮುಸುಂಕಿ ಬಿಬ್ಬಿರಬಿರಿವಂತಪ್ಪಿದುದು ದೇಹಮೊಂದೆಂಬಿನೆಗಂ

ಕಾಮನ ಬಾಣದಿರ್ಕೆವನೆಯೋ ಭ್ರಮರಾಳಿಯ ಸತ್ರಸಾಲೆಯೋಭೂಮಿಯದೊಂದು ಗಂಧಗುಣಮಿರ್ಪೆಡೆಯೋ ವಿಲಸತ್‌ ಸದಾಗತಿಪ್ರೇಮದೆ ಸೌರಭಂದಳೆದ ತಾಣಮೋ ಪೇಳಿಮಿದೆಂದು ಕಂಡವರ್ಕಾಮಿಸೆ ಮಾಲೆಗಾಱರೊಸೆದೋವಿದ ಪೂವಿನ ತೋಂಟಮೊಪ್ಪುಗುಂ

ಸುರಗಿಯ ಕಂಪು ಸಂಪಗೆಯ ಕಂಪದಿರ್ಗಂತಿಯ ಸೊರ್ಕುಗಂಪು ಪಾದರಿಯಲರ್ಗಂಪು ಪಡ್ಡಳಿಯ ಕಂಪಿರವಂತಿಯ ಕಂಪು ಮೊಲ್ಲೆಯೊಂದುರವಣೆಗಂಪು ಮಲ್ಲಿಗೆಯ ಕಂಪು ಸರೋಜದ ಕಂಪು ನೀಲನೀರರುಹದ ಕಂಪು ಕೇತಕಿಯ ಕಂಪೆಸೆಗುಂ ಸಲೆ ಪುಷ್ಪವಾಟಿಯೊಳ್

ಆ ನವಗಂಧಕ್ಕೆಳಸಿಯನೂನಂ ಮಧುಕರನಿಕಾಯಮೊಲ್ದನವರತಂನಾನಾ ಮಂಜುಳನಿನದದೊಳಾನಂದಂ ಮಿಕ್ಕು ಕಂಪನೀಂಟುತ್ತಿರ್ಕುಂ

ಬಿಗಿಯಪ್ಪಿ ಪುಷ್ಪರಸಮಂತೆಗೆದೀಂಟಿ ತುಳುಂಕಿ ತೂಱಿ ತೇಂಕಾಡಿ ಮನಂಮಿಗೆ ಸೊರ್ಕಿ ಜಿನುಗಿ ಜೀವಿಸಿಮಗಮಗಿಸಿತ್ತೊಂದು ಮಧುಕರಂ ಮಲ್ಲಿಗೆಯೊಳ್

ಧೃತಕಂಟಕಮಾದೊಡಮುನ್ನತಿಯಂ ಕೇತಕಿಯೊಳೆಱಗಿದುದು ಮಧುಕರನಿಂತತಿರೂಕ್ಷರಾದೊಡಂ ಸ್ನೇಹಿತರಂ ಕಾಯಲ್ಕೆ ಬರ್ಪುದೇ ಧಾರಿಣಿಯೊಳ್

ಭದ್ರಮೆನಿಸಿರ್ದ ಕುಸುಮಲಸದ್ರಸಮಂ ಪೀರ್ವ ಪದದೊಳೊಪ್ಪಿತು ಮದನಂಮುದ್ರಿಸಿದಂಬಿನ ಲಾಕ್ಷಾಮುದ್ರೆಯಿದೆಂಬಂತೆ ತೀವಿದಳಿನಿಕುರುಂಬಂ

ನನೆಯಂ ಮುಂಡಾಡುತೆ ಬಲ್ನನೆಯಂ ಬಲವಂದು ಮುಗುಳನಾಲಿಂಗಿಸಿ ಕಂಪಿನ ಬಿರಿಮುಗುಳಂ ಚುಂಬಿಸಿಯನುನಯದಿಂದಲರನಲೆದು ತೀವಿದುವಳಿಗಳ್

ಅಂಡಲೆದು ಜಾದಿಯಂ ಬಂಡುಂಡಳಿಯಂ ಮಿಕ್ಕು ಮಧುಕರಂಗಳ್ ಭರದಿಂಬಂಡುಣ್ಬುವೆನೆ ಸುಗಂಧಮಖಂಡಿತಮತಿನುತ ರಸೋದಯಂ ಮಾಳತಿಯಾ

ಆ ವನದ ಕೊಳದ ಪೂಗೊಳನೇವೇಳ್ವೆಂ ಹಂಸೆ ರಾಜಹಂಸೆಗಳಾಹಾತಾವರೆ ಹೊಂದಾವರೆಗಳ್ಮಾವಿಮ್ಮಾವಳಿ ಮದಾಳಿ ಗಿಳಿಯರಗಿಳಿಗಳ್

ತವೆ ಬೆಳೆದ ಪೊಸ ಪನಸು ಬಕ್ಕೆವಲಸು ನಳನಳಿಸುವಿಕ್ಷು ಪುಂಡ್ರೇಕ್ಷು ಪಳಂಚುವ ತೆಂಗವು ಚೆಂದೆಂಗೊಪ್ಪುವ ದಾಳಿಂಬಂಗಳೆಲ್ಲ ರಸದಾಳಿಂಬಂ

ಬನವಿದೆ ನೋಡು ಸರ್ವಸುಖಮಪ್ಪುದು ಕೇಳ್ ನುಡಿಯಿಲ್ಲ ತಣ್ಣೆಲ‌ರ್ಮನದೊಲವಿಂದೆ ತೀಡುತಿದೆ ಚೆಲ್ವು ಮನೋಹರಮಿರ್ಪುದಳ್ಕಱಿಂದನುದಿನಮೆಯ್ದಿ ಕಿಂಪುರುಷ ಕಿನ್ನರ ಖೇಚರ ಭೂಚರಾದಿ ಮಂಡನ ಮಿಥುನಂ ರತೀಶ್ವರ ಸುಖಾಬ್ಧಿಯೊಳೊಪ್ಪುಗುಮಾ ವನಾಂತದೊಳ್

ಸುರತರ ವೊಂದೆ ತತ್ಸುರಭಿಯೊಂದೆ ಸುರಾಪಗೆಯೊಂದೆ ನಿಶ್ಚಯಂಸುರಪುರದಲ್ಲಿ ಇಲ್ಲಿ ಸುಮನಸ್ತರು ಗೋ ಪಶು ನಿರ್ಜರಾಪಗೋತ್ಕರಮುಮನಂತಮೆಂದು ಗಿರಿರಾಜ ಪುರೋಪವನಾಳಿಯಲ್ಲಿಯಪ್ಸರತತಿ ಕಿನ್ನರಪ್ರತತಿ ಕಿಂಪುರುಷವ್ರಜಮಿರ್ಪುದಾವಗಂ

ಮೊಗಮಬ್ಜಂ ಲೋಚನಂಗಳ್ ಕುವಲಯಮಧರಂ ಬಿಂಬಮಾ ನಾಸಿಕಂ ಸಂಪಗೆ ತೋಳ್ ಶಾಖಾನಿಕಾಯಂ ಘನಕುಚಯುಗಳಂ ಚಕ್ರವಾಕದ್ವಯಂ ನಾಭಿ ಗಭೀರೋದ್ಯತ್ಸರಂ ತೋಱುವ ತೊಡೆ ಕದಳೀಸ್ತಂಭಮಂಘ್ರಿ ಪ್ರವಾಳಂಸೊಗಸಿಂ ತಾವಾಗೆ ತನ್ನಂದನಮೆ ಘನ ವನಶ್ರೀಗೆ ರೂಪಾಗಿ ತೋರ್ಕುಂ

ಆ ವನದ ಪುರದ ನಡುವೆ ಸುಖಾವಹಮತಿವಿಭ್ರಮಂ ವಿಶಾಲಂ ಸರ್ವೋರ್ವೀವರ ಶಸ್ತ್ರಾಭ್ಯಾಸ ನಿಜಾವಾಸಂ ಸುಭಟಪಟಲ ಪಟುರವಭರಿತಂ

ಹಯಶಿಕ್ಷಕರಿಂ ಗಜಶಿಕ್ಷೆಯ ಭೀಕರದಿಂ ಸ್ರವಂಗುಡುವ ಜೋದರ ಸಂಚಯದಿಂ ನಯದಿಂ ವೈಹಾಳಿಯ ಬಯಲೊಪ್ಪಿತ್ತು ಪಟ್ಟಣದ ವನದೆಡೆಯೊಳ್

ಕರಿಗಳ್ ಬಾಳ್ಗಂಬದೊಳೊಪ್ಪಿರುತ್ತಿರ್ದುವು ಸುಳಿವ ನೀಲಮೇಘಾವಳಿಯಂತರದಿಂ ಸೆಱೆಯಿಟ್ಟಂತಾಗಿರಿಪತಿ ಸುರಪತಿಯ ಹಗೆಯ ಹರಿಬದ ಚಲದೊಳ್

ಸುರಿವ ಮದಂ ಮಳೆ ಗಂಭೀರ ರವಂ ಮೊಳಗಂಗಮಂಬುದಂ ದಂತಂ ನಿಷ್ಠುರದಿಂದೆಱಗುವ ಸಿಡಿಲಾಗಿರೆ ಕಾರ್ಗಾಲದವೊಲಿರ್ದುವಲ್ಲಿಯ ಕರಿಗಳ್

ಧರೆಯಂ ಸುತ್ತಿದ ಜಲಧಿಗೆಪುರುಡಿಸಿ ಪುರವಳಯ ವಿಳಸಿತ ಪ್ರಾಕಾರಂಪುರಮಂ ಸುತ್ತಿರ್ಪುದು ತತ್ಪರಿಖಾತ ಜಲೌಘಮೌರ್ವವಿಹರಣದೂರಂ

ಹರಿ ಮತ್ಸ್ಯಾಕಾರದೊಳುದ್ಧುರತಮನಂ ಹತಿಸಲೆಂದು ಪಾತಾಳ ತಳಕ್ಕಿರದಿಳಿದ ತಾಣಮೆಂಬಂತಿರೆ ಪುರದಗಳಿರ್ಪುದತುಳಮತಿ ಗಂಭೀರಂ

ಪಳಿಕಿನ ಕೋಂಟೆ ಬಟ್ಟದೆನೆ ಬೇವಿನ ದಂಡೆ ನಭಕ್ಕೆ ಮೀಱುವಟ್ಟಳೆ ನಿಮಿರ್ದೇಱಿ ಪಾಱುವ ಪತಾಕೆ ವಿರಾಜಿಪ ಗೊಂಟು ಗೊಂಟಿನೊಳ್ಬಳಸಿದ ಕೊತ್ತಳಂ ಸೊಗಯಿಪಾಳ್ವರಿ ಡೆಂಕಣಿ ಸಾರಮಾಗಿಯಗ್ಗಳಿಸುವ ಗೋಪುರಂ ಪುಲಿಮೊಗಂ ಮೆಱೆಗುಂ ಪುರದೊಳ್ ನಿರಂತರಂ

ನೆಗೆದ ಪತಾಕಾಪಟಕೋಟಿಗಳೊಪ್ಪಿದುವಾವಗಂ ತೊಳಲ್ದು ಬಳಲ್ದಾಖಗನ ತುರಂಗಪ್ರತತಿಗೆಗಗನಾಂಗನೆ ಬೀಸುತಿರ್ಪ ವೀಜನತತಿವೋಲ್

ಬಗೆವೊಡಮರಾವತಿಗೆ ಮಿಥಿಳೆಗೆಯುದಯನಗಕ್ಕೆ ಉಜ್ಜಯಂತಿಗೆ ದಿಟಮಾನಗರಿ ಗುಣೋನ್ನತಿಯಿಂದಂದ್ವಿಗುಣಂ ತ್ರಿಗುಣಂ ಚತುರ್ಗುಣಂ ಪಂಚಗುಣಂ

ಪೊಸಸೊದೆ ಕೌಮುದಿಯಂ ಪಸರಿಸೆ ಕನಕದ ಕಳಶಮಾಲೆ ಪೊಂಬಿಸಿಲಂ ಪೂರಿಸೆ ತರತರದಿಂದಂ ರಾಜಿಸುತಿರ್ಪುವು ಸೋಮಸೂರ್ಯವೀಧಿಗಳದಱೊಳ್

ನಯದಿಂ ಮಾಱುಗುಡುವ ಕೊಳ್ವ ಯತ್ನಪೂರ್ವಕದೊಳಿರ್ಪ ಘನಧನಿಕರ ಪಙ್ತಿಯ ಮುಂದೆ ಸಂದಣಿಸಿ ವಿಕ್ರಯ ನವ ಕಳಮಾದಿಧಾನ್ಯರಾಶಿಗಳೆಸೆಗುಂ

ಪರಿಮಳದಾಡುಂಬೊಲನಿದುವರವಿಟರ ವಿಶಾಲ ಲೋಲ ಲೀಲಾಸ್ಥಲಮಾತುರಿಸುವ ತುಂಬಿಗಳೌತಣದರಮನೆಯೆನೆ ಪುಷ್ಪವಿಕ್ರಯಸ್ಥಲಮೆಸೆಗುಂ

ಭರದಿಂ ಪೂಮಾಲೆಗಳಂತರದಿಂ ಪಿಡಿದೆತ್ತಿ ನಿಂದ ಶಶಿಮುಖಿಯರ್ ಬಂಧುರ ಶಶಿಕಳೆಗಳನೀವಂತಿರಿರ್ದರಾ ವಿಟಚಕೋರ ಸಂಗತಿಗಾಗಳ್

ವರಮಲ್ಲಿಗೆ ಮೊಲ್ಲೆಗಳೊಳ್ಬೆರಸಿದ ಮಧುಕರಕದಂಬದಿಂದಂ ನೀಲೋತ್ಕರಮಂ ಮೌಕ್ತಿಕಮಂ ಪೋಲ್ತಿರೆ ಮೆಱೆದಳ್ ಮಾಲೆಗಾರ್ತಿ ಮಣಿಗಾರ್ತಿಯವೋಲ್

ನಗೆಗಣ್ಗಳ ಕಾಂತಿಯ ಸೆಳ್ಳುಗುರ್ಗಳ ಕಾಂತಿಯ ಕರದ್ವಯದ ಕಾಂತಿಯ ಮಾಲೆಗಳಂ ಹೊಸಹೂವಿನ ಮಾಲೆಗೆತ್ತು ಬೆಲೆಗೊಟ್ಟು ಕೊಂಡು ನಗಿಸಿದನೊರ್ವಂ

ಎತ್ತಿದುದೊಂದು ಮಾಲೆ ಪೊಸಪೂವಿನ ಬಿಲ್ಲವೊಲಾಗೆ ಮೀಱಿ ಬೆಂಬಿತ್ತುವ ನೋಟಮಂಗಜನ ಬಾಣದವೋಲಿರೆ ಕಾಯಕಾಂತಿ ಸೈತೊತ್ತಿದ ಮೌರ್ವಿಯಂತಿರೆಸಲೆಂದು ಯುವೋನ್ಮೃಗಮಂ ಕಱುತ್ತು ಕೋಲೆತ್ತುವ ಬೇಂಟೆಕಾರ್ತಿಯರವೋಲೆಸೆದ‌ರ್ ಮಿಗೆ ಮಾಲೆಕಾರ್ತಿಯರ್

ಎಸೆಯೆ ಪುರಂಧ್ರಿಯ‌ರ್ ಪಡೆದು ಸಂಗಮಿರ್ದು ಮನೋನುರಾಗದಿಂದಸುವೆಯಕಲ್ಗಳಂ ತೊಳೆದು ಚಂದನಮಂ ಪನಿನೀರ್ಗಳಿಂದೆ ಚಾರಿಸಿ ಹಿಮಚೂರ್ಣಮಂ ತಳಿದು ಕಂದುಗಳಂ ಪಿಡಿದೌಂಕಿ ನೂಂಕಿದ‌ರ್ದೆಸೆ ದೆಸೆಗೆಲ್ಲ ಕಂಪೆಸಗೆ ಗಟ್ಟಿಮಗುಳ್ಚುತೆ ಗಟ್ಟಿವಳ್ತಿಯ‌ರ್

ಸುಳಿಗುರುಳಾಡೆ ತೋಳ್ಗಳೆಡೆಯಾಡೆ ಬೆಮರ್ ಮಿಗೆ ಮೂಡೆ ಸುಯ್ಯೆಲ‌ರ್ಮಿಳಿರೆ ಕುಚಂಗಳೊತ್ತರಿಸೆ ಕಕ್ಷಪುಟಂ ನಸುದೋಱೆ ಮೇಲುದಿಂಬಳಿಯೆ ಕರಂ ಕರಂ ಕೊರಗೆ ಸೋರ್ಮುಡಿ ಲಂಬಿಸೆ ಕರ್ಣಪೂರಿತೋತ್ಪಳಮೊಲೆದಾಡೆ ಗಟ್ಟಿಗಳನಂದು ಮಗುಳ್ಚಿದರಿಂದುವಕ್ತ್ರೆಯರ್

ಚಂದನಗಂಧಕ್ಕುಂ ವದನೇಂದೀವರ ಪರಿಮಳಕ್ಕಮೆಱಗುವ ಭೃಂಗೀವೃಂದಮನುಱೆ ಸೋವುತ್ತುಂಮಂದಯ್ಸಿ ಮಗುಳ್ಚಿ ಗಟ್ಟಿವಳ್ತಿಯರೆಸೆಗುಂ

ಬೆಳಗಿನ ಬಿಂಬಂಗಳನಂತಳವಡೆ ತರತರದಿನಿಳಿಪಿದಂತಿರ್ದುವು ನಿರ್ಮಳ ಪಾತ್ರಾಕುಲದಿಂದಂತೊಳತೊಳಗಿರುತಿರ್ಪ ಕಂಚುಗಾಱರ ಪಸರಂ

ಚಾರುತರ ವಿಮಳ ಮೌಕ್ತಿಕಹಾರಾದಿ ಸಮಸ್ತರತ್ನರಾಶಿಗಳಿಂದಂನೀರೋಡಿದ ರತ್ನಾಕರದೋರನ್ನಮದಾಯ್ತು ರನ್ನವಸರಂ ಪುರದೊಳ್

ತೀವಿರ್ಪಶ್ವಾವಳಿಯ ಗಜಾವಳಿಯ ನರಾವಳಿಗಳ ವಿಕ್ರಯದಿಂದಂಭಾವಿಸೆ ದೂಸಿಗವಸರಂಮೂವರ್‌ ರಾಯರನೆ ಮಾಱುವಂತೆಸೆದಿರ್ಕುಂ

ತನತನಗೆ ಪೊನ್ನರಾಶಿಯನನವರತಂ ಮುಂದುಗೊಂಡನೇಕ ಕುಬೇರ‌ರ್ಜನಿಯಿಸಿ ನಿಂದಂತಿರ್ಪುದುಕನಕವ್ಯವಹಾರದಿಂದೆ ವೈಶ್ಯಕದಂಬಂ

ನೀಲದ ಪಚ್ಚೆಯ ಪವಳದಶಾಲೆಗಳ ಮರೀಚಿಯಂ ಪುರಂದರಧನುಗೆತ್ತಾಲೋಕಿಸಿ ನವನರ್ತನಲೀಲೆಯನೊಳಕೊಳ್ವುವಲ್ಲಿ ಪುರದ ನವಿಲ್ಗಳ್

ಬೆಳೆಬೆಳೆಪ ಸುಧಾಧವಳಿತನಿಳಯಂಗಳ ಧವಳಕಾಂತಿಯಂ ಕೌಮುದಿಗೆತ್ತೆಳಸುತ್ತಿರ್ಪುವು ಪಗಲುಂಬಳಸಿ ಚಕೋರಾಳಿ ಪುರದ ನಿಳಯದೊಳೆಲ್ಲಂ

ಒದವಿದ ಮುತ್ತಿನ ಮಾಣಿಕ್ಯದ ಗೋಮೇಧಿಕದ ಪುಷ್ಯರಾಗದ ವೈಡೂರ್ಯದ ವಜ್ರದ ಪಚ್ಚೆಯ ಪವಳದ ನೀಲದ ಕಳಶದಿಂ ಶಿವಾಲಯಮೆಸೆಗುಂ

ಶ್ರುತಿಘೋಷಂ ಮಂತ್ರಘೋಷಂ ನತಜನಜಯಘೋಷಂ ಪುರಾಣಪ್ರಘೋಷಂಸ್ಮೃತಿಘೋಷಂ ಗೀತಘೋಷಂ ಪರಶಿವ ವಿಮಳಜ್ಞಾನಸಂವಾದಘೋಷಂಕೃತಿಘೋಷಂ ಯಜ್ಞಘೋಷಂ ಪರಿಣಯನ ಮಹೋತ್ಸಾಹವಿಸ್ತಾರಘೋಷಂಸತತಂ ತೀವಿರ್ಪುದಂತಾ ಪುರದೊಳಭವಗೇಹಾವಳೀ ವಾದ್ಯಘೋಷಂ

ವಿಳಸತ್‌ ಸೇವಾಪುರಂಧ್ರೀನಿಕರ ಚರಣಮಂಜೀರ ತನ್ಮುದ್ರಿಕಾ ಮಂಜುಳನಾದಂ ರಾಜಪುತ್ರಪ್ರಕರ ಪರಿವೃತಾಶೇಷಗೀತ ಪ್ರಣಾದಂಜಳಪಾನಾಸಕ್ತ ಮುಕ್ತದ್ವಿಪಕುಲ ನಿಗಳವ್ರಾತ ಸಂಭೂತ ನೂತ್ನೋಜ್ವಳನಾದಂ ಪೊಣ್ಮುತಿರ್ಕುಂ ನರಪಯುತ ಕವೀಂದ್ರಾಸ್ಯ ಸಂಸ್ತೋತ್ರನಾದಂ

ತಿಂತಿಣಿಪ ನಿಳಯದಿಂ ಜನದಿಂ ತರದಿಂದೆಸೆವ ವೀಧಿಯಿಂ ನೃಪಕುಲದಿಂದಂ ತರುಣೀತತಿಯಿಂ ತಾನಿಂತೊಪ್ಪುವುದಿಳೆಯೊಳೋಪಪ್ರಸ್ಥಪುರಂ

ಶ್ರೀ ಪರಮೇಶ್ವರಾಂಘ್ರಿ ಸರಸೀಜಮಧುವ್ರತನುದ್ಘತೇಜನುರ್ವೀಪತಿ ಸರ್ವದಿಗ್ಭರಿತ ಕೀರ್ತಿಯುತಂ ವರಭೂಭುಜಂ ಜಗದ್ದೀಪಕನತ್ಯುದಾರನತಿಧೀರನತಿಸ್ತುತಿಪಾತ್ರಗೋತ್ರನಂತಾ ಪುರನಾಥನೊಪ್ಪುವನುದಾತ್ತಗುಣಂ ಗಿರಿರಾಜನುರ್ವಿಯೊಳ್

ಪರಭೂಪಾಲ ವಿಶಾಲ ಮೌಳಿಮಣಿಸಂಘಾತ ಪ್ರಭಾಪುಂಜವಿಸ್ತರಪಾದಂ ನತ ಸರ್ವಲೋಕನಭಯಂ ತೀವ್ರಪ್ರತಾಪಂ ಮಹೀಧರರಾಜಂ ಮಹಿಮಾಂಬುರಾಶಿಯಚಳಂ ಭರ್ಗಪ್ರಿಯಂ ಭೋಗಭಾಸುರನುದ್ದಾಮಗುಣಂ ಪ್ರಚಂಡಭುಜನೊಪ್ಪಿರ್ಪಂ ನಗಾಧೀಶ್ವರಂ

ಎಱಗದ ಭೂಪರಿಲ್ಲ ಬೆಸಕೆಯ್ಯದ ರಾಜಕುಮಾರರಿಲ್ಲ ಕೂರ್ತಱಿಯದ ಪೆಣ್ಗಳಿಲ್ಲ ತಲೆವಾಗದ ಚಾಗಿಗಳಿಲ್ಲ ತಳ್ತು ಕುಕ್ಕುಱಿಸದ ವೀರರಿಲ್ಲ ನತರಾಗದ ಬಲ್ಲಿದರಿಲ್ಲ ಕೀರ್ತಿಯಿಂತುಱುಗದ ದಿಕ್ಪ್ರತಾನಮಣಮಿಲ್ಲೆನೆ ಬಾಳ್ವನಗಾಧಿನಾಯಕಂ

ಆತನ ಪುಣ್ಯವಲ್ಲಭೆ ವಿರಾಜಿತೆ ಪೂಜ್ಯೆ ಪರಾಪರೈಕ ವಿಖ್ಯಾತೆ ಪತಿವ್ರತಾಗುಣವಿಭೂಷಣೆ ಸಲ್ಲಲಿತಾಂಗಿ ಸತ್ಯೆ ಶೈವಾತುರೆ ಶಾಂತೆ ಶಾಶ್ವತೆ ಶುಭಾಚರಣಾನ್ವಿತೆ ಮಾನ್ಯೆ ಸದ್ಗುಣವ್ರಾತೆ ವಿಳಾಸ ವಿಭ್ರಮ ಕಳಾನಿಧಿ ಮೇನೆಯೆನಿಪ್ಪಳುರ್ವಿಯೊಳ್

ನುಡಿಯದಿರಾಂಧ್ರ ಕೆಯ್ಮುಗಿ ಕಳಿಂಗ ಕುನುಂಗೆಲೆ ವಂಗ ಕೇರಳಂಗೆಡೆಗುಡು ಚೋಳ ಲಾಳ ಪೆಱಸಾರ್ ಪುಗದಿರ್ ಮಗಧೇಶ ಕಾಣ್ಕೆಯಂಪಿಡಿದಿರು ಪಾಂಡ್ಯ ಬಿನ್ನವಿಸು ಮಾಳವ ಗೌಳನೆ ಪಿಂಗೆನುತ್ತಣಂಜಡಿವರಿಳೇಶರಂ ಪಡಿಯಱರ್ ಗಿರಿರಾಜ ಸಭಾಂತರಾಳದೊಳ್

ಪರಮಸ್ವಾಮಿ ಜಟಾಧರಂ ಶಶಿಧರಂ ಗಂಗಾಧರಂ ಕಾಲಸಂಹರನಜ್ಞಾನಹರಂ ಪುರತ್ರಯಹರಂ ಸೌಖ್ಯಕರಂ ಶಂಭು ಶಂಕರನಾನಂದಕರಂ ಸಮಂತೆನಗೆ ಭಕ್ತಿಜ್ಞಾನ ವೈರಾಗ್ಯಮಂಕರುಣಂಗೆಯ್ಗೊಲವಿಂದೆ ಹಂಪೆಯ ವಿರೂಪಾಕ್ಷಂ ಶಿವಾವಲ್ಲಭಂ